LAOAG CITY – Natay ti maysa a babai kalpasan a binagku-bagkong ti dati a live-in partner-na iti Barangay 18, San Pedro iti ili ti San Nicolas.
Nabigbig ti biktima a ni Lovely Joy Pagaduan, agtawen ti 30, helper, addaan ti live-in partner ken residente ti Barangay San Pablo iti ili ti San Nicolas idinto a nabigbig met ti suspek a ni Froiland Raspado alyas Allan, agtawen ti 28, construction worker, awanan asawa ken residente ti Barangay San Pedro iti nasao met laeng nga ili.
Basar iti San Nicolas Municipal Police Station, kabayatan nga adda iti pagtrabahoan ti biktima ket immasideg ti suspek ket ditoy nga adda ti inruarna a natadem a banag manipud iti belt bag-na ket kellaat a binagku-bagkongna ti biktima a dati a live-in partner-na iti sumagmamano a daras iti buksit ti biktima.
Naitaray iti Mariano Marcos Memorial Hospital and Medical Center iti siudad ti Batac ti biktima babaen kadagiti katrabahoanna ngem naideklar a pimmusay kabayatan a matamtaming.
Naglibas ti suspek kalpasan ti insidente ngem insigida met laeng a natiliw dagiti otoridad.
Mainaig iti daytoy, inpakaammo ni Mr. Cirio Pagaduan, ama ti biktima a sakbay ti insidente ket namin-adun a daras a pinangtaan ti suspek ti anakna a papatayenna daytoy.
Inbatadna a namin-adu a daras a pinakawan ti anakna ti suspek gapu kadagiti saan a napintas nga aramidna ngem gapu ta napunoan daytoyen ket nagdesision ti anakna a makisinan iti suspek iti saannan nga inbuksilan a rason.
Nupay kasta, kunana nga ipapilit ti suspek a makisinnublianan ngem saanen a kayat ti anakna.
Inlawlawagna a nasakit ti nakemna gapu ta awan man laeng ti natured a naganawa wenno timmulong iti anakna a nabagkong ti namin-pito a daras iti paset ti siket, buksit, barukong ken rupana.
Innayonna a nakainum ti suspek idi aramidenna ti insidente ken mamati nga adda ti impluwensia daytoy iti iligal a droga.
Naammoan a nagdenna ti biktima ken suspek iti uneg ti lima a tawen.
Iti agdama, nagtalinaed iti pagbaludan ti suspek kabayatan a maisagsagana ti maipila a kaso kontra kenkuana.
