LAOAG CITY – Natay ti maysa a babai kalpasan a naregreg iti nakikalubbunan na a motorsiklo iti Brgy. Manalpac iti ili ti Solsona.
Nabigbig ti biktima a ni Lydia Daguro, agtawen ti 49, balo ken residente iti Brgy. Bagbago iti nasao nga ili idinto a ti driver ti morotsiklo ket ni Wilson Fiesta, agtawen ti 54, backhoe operator ken residente iti Brgy. Manalpac iti nasao met la nga ili.
Iti inisyal nga imbestigasyon ti PNP, bayat nga agpapalaud a direksyon ti motorsiklo ket kelaat a naregreg ti biktima rason a naawanan ti kontrol ti driver iti manibela ken naaksidente da.
Dagus a naitaray ni Daguro iti Rural Health Unit iti ili ti Solsona ngem naiyakar iti Dingras District Hospital para iti naan-anay koma a pannakapaagas na ngem naideklara a dead on arrival babaen kenni Dr. Rose Ann Corpuz idinto a saan a nasugatan ti driver
Nagtalinaed ti driver iti kustudyar ti PNP Solsona.
Kabayatanna, inrakurak ni Police Capt. Chris Anthony Sorsano, hepe ti PNP Solsona nga awan pay ti kumpirmasyon no adda iti impluwensya ti nasanger ti babai a biktima ti aksidente iti Brgy. Manalpac iti nasao nga ili.
Daytoy ket kalpasan a pimmusay ni Lydia Daguro, agtawen ti 49, balo ken residente iti Brgy. Bagbago, Solsona gapu iti pannakaregreg na manipud iti naglubbonan na a motorsiklo nga inturong ni Wilson Fiesta, agtawen ti 54, backhoe operator ken residente iti Brgy. Manalpac iti nasao nga ili.
Segun kenni Sorsano, saan da a mapnek iti palawag ti driver a maipagarup a pannakaregreg ti biktima kalpasan ti insidente.
Kuna na nga imbesigaren da a naimbag ti napasamak ken iyur-urayda ti resulta ti eksaminasyon manipud iti doktor sakbay nga iwayat da ti sumaruno a prosseso ti panagimbestigar.
Inbatad ni Sorsano a sakbay ti pasamak ket maipagarup nga adda ti napasamak a komusyon a nakairamramanan ti biktima.
Segun pay ken ni Sorsano, adda ti karelasyon ti biktima a balo nga agnagan ti Efren no sadinno a nakaapa na ti anak ti nobyo na.
