LAOAG CITY – Natay ti maysa a babai idinto a nasugatan dagiti dua a lubbon na a menor de edad kalapsan a natinnag ti motosiklo a nagluganan da iti maar-aramid a road widening iti Brgy. Nalvo iti ili ti Pasuquin, Ilocos Norte.
Segun kenni SPO1 Joey Aninag ti PNP Pasuiquin, ti biktima ket ni Cilyn May Buliman, agtawen ti 18 ken tubo iti Claveria, Cagayan.
Iti inisyal nga imbestigasyon dagiti otoridad, agturong iti abagatan a direksyon ti biktima idi kellaat a naawanan ti kontrol ti driver ti motorsiklo ken natinnag iti kanal.
Gapo iti daytoy, naubon ti bagi ti biktima kadagiti nakatakder a landog iti kanal idinto a nakaro ti sinagaba a sugat dagiti dua a menor de edad.
Naitaray iti ospital dagiti tallo ngem naideklara a dead on arrival ni Buliman.
