LAOAG CITY – Natiliw ti maysa a balasang babaen ti entrapment operation ti PNP San Nicolas iti sango ti DFA Ilocos Norte kalpasan ti maipagarup a panangloko na dagiti agassawa.
Nabigbig ti suspek a ni Vanessa Leaño y Miñon, agtawen ti 25, balasang ken residente iti Brgy. Balacad ditoy ti siudad ti Laoag.
Segun ti agnagan, Mrs. Medina Adbersalo, biktima ti nasao a suspek, ken tubo iti Lapaz, Abra, nagpabigbig ti suspek a maysa nga assistant iti Department of Foreign Affairs.
Kuna na a nagkita da iti maysa a pasdek panganan ken dimmawat ti suspek iti pagbayad para iti passport nga umabot iti 8,500 a pisos.
Inbatad ni Adbersalo a dimmanun ti suspek iti lugar iti ili ti Magsingal, Ilocos Sur ken dimmawat iti uppat a ribo a pisos.
Umabot iti nasurok 37,500 a pisos ti naited da kenni Leaño.
Naamuan ti Bombo Radyo a pito dagiti biktima ken maymaysa a pamilya daytoy nga agkalikagum nga agpasyarda iti ballasiw taaw.
Desidido a mangipila dagiti maseknan ti reklamo kontra kenni Leaño.
