LAOAG CITY – Natiliw ti maysa a babai kalpasan a sinerrek na ti maysa a pagtaengan iti Brgy. 6 ditoy ciudad ti Laoag.
Nabigbig ti suspek a ni Cristel Villarama, 20 ken residente iti Brgy. 3 ditoy ciudad idinto a ti biktima ket ni Dennet Nolasco, 27, awanan asawa.
Basar iti imbestigasyon ti PNP Laoag, nagna ti suspek iti tawa ti banyo iti umuna a kadsaaraan iti pagtaengan ni Nolasco idinto a nagturong daytoy iti maikadwa a kadsaaraan ken napan nagsuksukain kadagiti kagamitan.
Nangngeg ti biktima iti ringgor ket dita a nakita na ni Villarama a nagtaray a rimuar iti nagserrekan nga immuna ti suspek.
Naamoan nga apaman a limmabas dagiti kameng ti pulisya nga agpatpatrolya ket ditoy a natiliw da ti suspek.
Narekobre manipod kenni Villarama iti maysa a cellphone ken maysa a coin purse a naglaon ti 227 a pisos.
Naipakustodyaren ti suspek iti PNP Headquarters.
