LAOAG CITY – Tiniliw dagiti otoridad ti maysa a babai iti naisayangkat a drug buy-bust operation iti paset ti Barangay 15 ditoy ciudad ti Laoag.
Nabigbig ti suspek a ni Rufilyn Galolo, addaan iti umno a tawen ken agpapaay iti maysa a bar ditoy ciudad ti Laoag.
Naala manipod iti suspek ti tallo a sachet a naglaon ti maipagarop a shabu, sumagmamano a drug paraphernalia ken ti sangaribo a pisos a nausar iti operasyon.
Iti interview ti Bombo Radyo iti suspek, inadmitir na nga agus-usar ti illegal a droga ken nasursuro na daytoy babaen iti customer na.
Nupay kasta, inpetteng na a saan nga aglaklako iti illegal a droga.
Inlawlawag na a ti laeng naibaga kenkuana ti amo na ket isuna ti napili ti customer da nga iruwar isut gapuna a simmurot ngem saanna a ninamnama nga agbalin a subject ti operasyon.
Inpakaammo na nga innem a bolan na paylaeng nga agpapaay iti bar ditoy ciudad.
