LAOAG CITY – Nagkamang ti maysa a babai nga empleyado ti Traffic Division ditoy ciudad ti Laoag kalpasan a dinangran ti maysa a lalaki iti ili ti Piddig.
Nabigbig ti biktima a ni Matda Domingo Asuncion, 33 ken residente iti Brgy. Talingaan ditoy ciudad ti Laoag idinto a ti suspek ket ni John Harold Hipolito, residente iti Brgy, 6 iti ili ti Piddig.
Segun kenni P/Capt, Khristoper King Ramos, Hepe ti PNP Piddig, kabayatan iti kaadda ti biktima kadwa na ti agnagan iti Lily Ann Pascual iti public plaza ti nasao nga ili ket inasitgan ida ni Hipolito ket dita a dinanog-danog na ni Asuncion iti naminadu a daras.
Gapu iti daytoy, nagsagaba iti sugat iti nagduduma a paset ti bagi ti biktima kangrunaan iti rupa ken ulona.
Kuna ni Ramos a saan pay a maestablisar no ania ti rason a nangdangran ti suspek ti nasao a biktima.
Naamoan nga agpada a nakainom dagiti maseknan idi mapasamak ti nasao nga insidente.
Iti agdama, agtultuloy iti imbestigasyon dagiti otoridad seknan iti nasao nga insidente ken mabirbirok metten ti suspek kalpasan a naglibas kalpasan ti nasao a panagdangran.
