LAOAG CITY – Nakigtot ni Anna Jackson, agtawen ti 22 manipud idiay Scotland idi naammoanna a masikog isuna kalpasan a nagturong daytoy iti ospital gapu ta inpagarupna a pimmutok ti appendix-na.
Kalpasan laeng ti 40 minuto, inpasngayna ti anakna a ni Talia Smith idi Marso 22, 2024.
Nangrugi ti amin idi makapasar ni Anna ti panagsakit ti buksitna nga inpagarupna a menstrual cramps.
Idi kimmaro ti sakitna, dagus daytoy a nagturong iti Forth Valley Royal Hospital kaduana ti partner-na a ni Euan Smith.
Gapu iti daytoy, positibo ti resulta ti pregnancy test-na ken naammoanna nga agley-labor isuna.
Iti uneg ti siam a bulan, saan a naripar ni Anna a masikog isuna.
Kabayatanna, ti saan a maaddaan ti menstruation ket inpagarupna a side effect ti in-inomenna a birth control ken ti panagdakkelna ket inpagarupna a simple laeng a panagmanas nga epekto ti lactose intolerance.
