LAOAG CITY – Pinaltu-paltogan ti saan pay a nabigbig a suspek ti maysa a babai iti Barangay San Mateo iti siudad ti Batac.
Segun ken ni P/Lt.Col. Jerome Wangkey, Hepe ti Batac City Police Station, ti biktima ket agtawen ti 39, naasawaan ken residente iti nasao met laeng a barangay.
Inbatadna a basar iti inwayatda nga imbestigasion, kagapgapu ti biktima a napan naglako iti basketball court ken apaman nga iparadana ti naglugananna a kurong-kurong ket adda ti nakitana a tugaw a makaabbeng iti pagdalananna isut gapuna a napanna inikkat.
Inlawlawagna a ditoy metten a kellaat a pinaltu-paltogan ti suspek ti biktima iti sumagmamano a daras iti saan pay a masinunuo a rason.
Kunana a tinamaan ti bala ti paltog iti namindua a daras iti baba a paset ti barukong ti biktima, namindua a daras iti akinkannawan a luppona ken naminsan a daras iti akinkannigid a luppona.
Mainaig iti daytoy, inpakaammo ni P/Lt.Col. Wangkey a basar iti biktima ket inladawanna ti suspek a bassit ken nakaabongot idi napasamak ti krimen ken insigida a naglibas iti saan pay a masinunuo a direksion.
Inpettengna a posible a calibre 45 a paltog ti inusar ti suspek iti nasao nga insidente.
Innayonna nga awan met ti malagip ti biktima a nakaririna wenno nagbasolanna a mabalin a mangaramid iti napasamak kenkuana.
Naammoan nga awan ti Close Circuit Television a nakaimuntar iti asideg ti pagtaengan ti biktima.
Iti agdama, addan iti stable wenno nasayaat a kasasaad ti biktima kabayatan nga agpapaimbag iti ospital.
