LAOAG CITY – Adda dakkel a peggad a maaddaan iti kanser ti matris dagiti babbai a masansan nga agus-usar kadagiti hair relaxer.
Iti panagadal ti Boston University kadagiti postmenopausal Black Women, agparang a 95% kadagiti nataengan a Black Women idiay Estados Unidos ti agus-usar kadagiti hair relaxer.
Pagaammo a panggep ti United States Food and Drug Administration nga isingasing ti pannakaiparit ti formaldehyde (FA) ken dadduma pay a kemikal a mangiruar iti formaldehyde a kas iti methylene glycol a ramen ti hair smoothing ken hair straightening products a mailaklako idiay Amerika.
Naduktalan nga adu a Black ken Latina a babbai ti masuspetsa a maaddaan iti gynecologic cancers kas ti breast, ovarian ken uterine cancer gapu iti napaot a panagusar kadagiti hair relaxers.
Iti kaudian a panagadal iti 45 a ribu a babbai nga awan ti pakasaritaanda iti kanser ken awan ti nadadael a matris a napagsaludsodan agarup 20 a tawenen ti napalabas, agparang a ti panangusarda kadagiti pangpalag-an iti buok ket mainaig iti sakitda.
Kas resulta ti pananganalisar, nagparang iti Black Women’s Health Study a dagiti babbai a postmenopausal nga agus-usar iti nasao a produkto iti mamindua iti makatawen ket 50% a nangatngato ti risgoda iti kanser ti matris no idasig kadagiti babbai nga agus-usar iti maminsan laeng wenno saan a talaga nga agus-usar iti hair relaxer.
Dagiti nadakamat a produkto ket naglaon kadagiti ramen dagiti napeggad a makasabidong ken carcinogens kas ti formaldehyde ken heavy metals a pakairamanan met dagiti phthalates, parabens ken dadduma pay a kemikal a mangriribok iti endocrine.
