LAOAG CITY – Nasugsugatan dagiti nakamotorsiklo kalpasan a nakidinnungpar da iti maysa a Mitsubishi L300 FB iti paset ti Barangay Caunayan it ciudad ti Batac.
Ti driver ti motorsiklo ket agtawen ti 16, estudyante ken residente iti Brgy. Camguidan iti nasao a ciudad ken dagiti lubbon na ket da Kevin Marzan y Barroga, agtawen ti 18 ken residente iti Brgy. Ablan ken ti agtawen met laeng ti 16 a taga Brgy. Acosta iti nakadamat a ciudad.
Nabigbig met ti driver ti Mitsubishi L300 FB a ni Joey Pecpec y Bangsal, 37, naasawaan ken residente iti Brgy. Cangrunaan, Batac City.
Segun iti imbestigasyon ti PNP-Batac, agpapaamyanan a direksyon ti motorsiklo idi maipagarop nga immagaw iti linya rason a nadungpar da ni Pecpec nga agpapaabagatan a direksyon.
Gapo iti daytoy, naipurwak dagiti biktima iti agarop 10 a metro ti kaadayo na a nangitunda ti pannakatukkol ti akin-kannigid a saka ken sugat iti ulo ti driver ken sugat met iti nagduduma a paset ti bagi ti maysa pay a menor de edad a lubbon.
Dagus met a naitaray dagiti biktima iti Mariano Marcos Memorial Hospital and Medical Center iti ciudad ti Batac para iti pannakataming da.
Naamoan a dagiti nakalugan ti motorsiklo ket naggapo iti paggi-inuman ken agawid da kuman iti napasamak ti insidente.
Innayon dagiti kameng ti PNP-Batac a saan a nakasuot ti helmet dagiti nadakamat a biktima.
