LAOAG CITY – Kinumpirmaran ni Mrs. Cydel Antonio, meat inspector iti slaughter house ditoy ciudad ti Laoag nga adda ti diamond skin disease ti maparti kuma a baboy.
Ummuna iti daytoy, kuna ni Antonio nga idi nangurungor ti baboy ken idi dilnakan da kuma ti napudot a danom ken nakita dagiti batik-batik iti kudil ti nasao a baboy.
Segun kenni Antonio, kalpasan daytoy ket dagus da nga inreport kenni Dr. Arthuro Cabello, City Veterinarian ken ditoy a naduktalan da nga adda ti sakit ti baboy.
Inlawlawag na a kalpasan daytoy ket inkutkot da ti baboy.
Mainaig iti daytoy, inbatad na a bacteria ti makagapo ti sakit ti baboy ken no adda ti kastoy ti maysa a taraken ket masapol a maagasan babaen ti antibiotics.
Nupay kasta, kuna ni Antonio nga awan ti sabali a baboy a naapektaran iti nasao nga slaughter house.
Naamoan a ti baboy ket naggapo iti maysa a dakkel a kompanya ken ginatang met ti kapitalista a saanen a nabigbig.
