LAOAG CITY – Kinumpirmaran ni ABC President George Padre iti ili ti Bacarra a naipaima kadagiti opisyal ti barangay ti bileg a mangmonitor kadagiti taraken a baboy iti kada barangay iti nasao nga ili.
Daytoy ket kalpasan a rimwar ti executive order ni Mayor Fritzie Gapasin mainaig iti nasao a banag.
Kuna na nga iti section 3 ti pammilin ti mayor ket saan a mailako dagiti taraken a baboy iti sabali nga ili ngem ketdi para laeng iti ili ti Bacarra.
Inbatad ni Padre a mangala da ti record kadagiti taraken a baboy kadagiti residente ken agreport da iti kada aldaw ti Biernes.
Masapul pay ti sertipikasyon manipud iti barangay chairman no mailako dagiti taraken a baboy.
Inlawlawag ni Padre, a mabalin ket a makaipastrek ti baboy iti ili da ngem masapul a dagiti laeng accredited a hog raisers ti mapalubusan.
Adda met dagiti agcheckpoint a kameng ti PNP Bacarra para kadagiti agiserrek ti baboy.
Maipalagip a nagkurang ti supplay ti baboy iti nasao nga ili no sadinno nga adda pay ti napasamak a pork holiday.
