LAOAG CITY – Inlawlawag ni Mr. Ramil Llanes, agtagikua ti R&A backyard farm iti ili ti Currimao nu kasano ti panagbalin ti “babuyang walang amoy” a proyekto na.
Segun ken ni Llanes a daytoy ket lungalong na ken pinondoan ti Department of Agiculture babaen iti you challenge.
Inlawlawag ni Llanes a kas iti mausar iti refrigerator nga uring tapno maliklikan ti panagbangsit daytoy, ti taep a nauram ti maipan iti beddings dagiti baboy ken saan a ti commercial.
Kuna na a babaen iti taep ket isu ti mangsagepsep ti nabangsit nga angot manipod kadagiti baboy.
Inbatad na a gapu ta aglungsot ti presko a taep ket masapol a mauram tapno saan nga alisto nga agperdi ken paggapoan met ti minerals para kadagiti baboy.
Mainaig iti daytoy, inpakaammo ni Llanes nga iti ubong dagiti baboy ket adda ti swimming pool ti mismo a likod na tapno isu ti pagpapawpawan dagiti taraken ken saanen a masapol a mapadigusan.
Innayun ni Llanes a nu maipanggep iti panagsukat ti taep a nauram kas beddings ket masapol laeng a manaynayunan ti inisyal a naikabil iti ubong kalpasan a madalusan ti marugitan dagiti baboy.
Kuna na nga iti swimming pool dagiti baboy ket madalusan daytoy kalpasan a mausar ken masukatan iti sabali a danom.
Inbatad na a namunganay ti pannakapanunot na ti nasao nga addang tapno maliklikan ti riri maipanggep iti nabangsit nga alawlaw gapu iti rugit ti baboy.
Kuna na a dakkel a tulong pay ti nasursuro na agricultural farming nga isu ti nangitunda iti innovation iti “babuyang walang amoy” a wagas na iti panagtaraken ti baboy.
Kabayatanna, ginutigot ni Llanes ti publiko kangrunaan kadagiti agtutubo a bayat a nasapa pay ket marugyan a masursuro ti agricultural farming gapu ta dakkel ti maited daytoy a benepisyo.
