LAOAG CITY – Inpakaammo ni Dr. Rufino Cravalho, Municipal Veterinary Office iti ili ti Bacarra nga agtultuloy ti panangipatungpalda kadagiti pagannurotan mainaig iti iseserrek dagiti baboy.
Segun kenkuana, adda ti nagpagnunumoan da a maiparit pay laeng ti panaglako kadagiti burias kadagiti tiendaan.
Mainaig iti daytoy, nainget ti monitoring kadagiti agparparti ken aglaklako iti karne ti baboy iti public market.
Kinunana a no adda dagiti matakuatan a manglabsing iti pammilin nga inyatnag ti opisina ti Mayor iti nadakamat nga ili ket masuspenso dagitoy nga lako ti karne ti baboy.
Mangnamnama ni Dr. Cravalho a babaen iti nainget a panag-monitorda ket malapdan ti iseserrek ti African Swine Fever (ASF) virus iti ili ti Bacarra.
