LAOAG CITY – Plano ti Gobierno Probinsial ti Ilocos Norte ti pannakailako ti Badoc Island a kinumpirmaran mismo ni Gob. Matthew Marcos Manotoc kabayatan ti naiyuswat a forum.
Maibasar iti impormasion, kalikagum ti Gobernador a mailako ti nasao nga isla iti maysa a luxury resort developer no sadino adda ti kabaelanna a mangiyestablisar ti napinpintas ken maibilang a high-end.
Ti Badoc Island ket ditoy a pakasarakan ti white sand beach ken nalit-aw a danum ti baybay a mabirukan iti maysa a kilometro sakbay a makadanon iti ili ti Badoc nga isu ti masungad a lugar ditoy probinsia.
Segun ken ni Gob. Manotoc, iti naiyuswat a forum ket nakalukaten para kadagiti investors ti Badoc Island sipod idi Pebrero 2021 nangruna ket bimmaba ti napastrek iti benneg ti turismo ditoy probinsia gapu iti pangta ti COVID-19 pandemic.
Mainaig iti daytoy, ikarkarigatan met ti Bombo Radyo Laoag nga alaan ti komento ni Provincial Tourism Officer Ainree Racquel seknan iti daytoy.
