LAOAG CITY – Nagsinan ti bagi ken ulo ti maysa a bangkay a naduktalan iti kabantayan a paseti iti Sitio Binasay iti Brgy-40 Balatong ditoy siudad ti Laoag.
Nabigbig ti biktima a ni Julie Alegre, tubo iti Bulacan ngem agdama nga agtrabtrabaho iti Housing Construction Site iti Brgy. 17 iti ili ti San Nicolas.
Segun ken ni PLt. Col Rafael Lero, ti chief of police iti PNP Laoag, basar iti imbestigasyon ket maysa nga agbirbirok ti uong ti maysa a residente iti Brgy. Balatong iti kabanbantayan ti nakaangot ti nabangsit isut gapu na a binirok na daytoy ket dita a nakakita ti maysa a pares ti tsinelas.
Mainaig iti daytoy, nakita na iti asideg ti bagi ti maysa a tao nga arig nga agrupsan ken awanan ti ulo ngem nakita na a nakabitin iti kayo.
Kabayatanna, immunan nga inpakaano ni Jimmy Tablante, katrabahoan ti biktima nga iti bigat ti Agosto 12 ket pinanawan na iti barracks ni Alegre tapno mapan iti construction site.
Nu pay kasta, kuna na nga iti panagsubli na ket saanna a nadanunan ni Alegre agingga a nadanunan ti bigat ti Agost 13 ket saanna a pulos a napasangpet.
Gapu iti daytoy, inbatad na a nagkamang iti admin ti construction site, barangay ken iti PNP San Nicolas tapno maipakaamo a mapukpukaw ni Alegre.
Kabayatanna, rurumuar a nagpakamatay ti biktima agsipod ta sakbay a nagpukaw ket maipagarup nga ado dagiti panpanunuten na ken problemado ti langa na.
Iti agdama ket agtultuloy ti naiget nga imbestigasyon dagiti otoridad seknan ti nasao nga insidente.
