LAOAG CITY – Pormalen a nalukatan ti Large Scale Trading Center wenno ti Bagsakan Center iti siudad ti Batac.
Segun ken ni Vice Gov. Matthew Marcos Manotoc, kangrunaan a gagem daytoy a maikonektar dagiti mannalon ken dagiti kooperatiba kadagiti industrial buyers.
Inbatadna a babaen iti daytoy ket napinpintas ti presio a pakailakoan ti produkto dagiti mannalon ken nasken a malabanan dagiti traders para iti pagsayaatan dagiti mannalon.
Inlawlawagna a mabalin dagiti amin a mannalon ditoy probinsia ti mapan aglako iti bagsakan center nangnangruna no bulto wenno adu dagiti ilako dagitoy a produkto.
Maipalagip a ti nasao a proyekto ket nagbibinnuligan ti Provincial Government of Ilocos Norte, City Government of Batac ken ti Department of Agriculture Region 1.
Immuna iti daytoy, inrakurak ni Engr. Maria Teresa Bacnat, Officer-In-Charge ti Provincial Agriculture Office a tumulong ti opisinada a mangikonektar kadagiti mannalon kadagiti mabalin dagitoy a pangilakoan kadagiti produktoda iti napintas a presio.
