LAOAG CITY – Nagikkat iti puesto kas Special Adviser ti Independent Commission for Infrastructure ni Baguio City Mayor Benjamin Magalong.
Kinumpirmaran daytoy ti staff ti Mayor sumagmamano nga oras kalpasan nga inrakurak ti Malacañang nga ad-adalenda pay laeng ti appointment-na gapu iti maipagarup a conflict of interest.
Insubmitir ni Magalong ti resignation letter-na ken ni Presidente Ferdinand Marcos Jr. ita nga aldaw, Setiembre 26, 2025.
Nakailanad iti nasao a surat a saanna a baybay-an dagiti kangrunaan a responsibilidadna para kadagiti kailianna idiay Baguio City no sadinno a daytoy ti kangrunaan a sentro ti public service-na.
Immunan nga inrakurak ti Malacañang nga ad-adalenda a naimbag ti appointment ni Magalong iti Independent Commission for Infrastructure gapu ta ipawpawil iti gobierno ti maaddaan ti dua a posision.
