LAOAG CITY – Maysa a baka idiay Brazil ti nakagun-od ti Guinness World Records kalpasan a nailako daytoy iti gatad a 26 million Brazilian real wenno katukad ti sumurok-kumurang a P280 million iti maysa nga auction iti Minas Gerais.
Ti baka a napanaganan a Viatina-19 ket maysa a Nelore breed ket agdagsen ti 1,101 a kilo, doble iti masansan a dagsen daytoy iti nasao a klase.
Gapu iti naisangsangayan a rukod ken kalidad, daytoyen ti kanginaan a baka a nailako iti pakasaritaan iti intero a lubong.
Malaksid iti kinadakkel ken kinadagsenna, ni Viatina-19 ket am-ammo pay gapu iti naidumduma a breed daytoy. Addaan daytoy ti napintas ken napigsa a pammagbagi ken kabaelanna nga agpaot iti nakabarbara a klima.
Gapu iti naidumduma a genetic makeup daytoy ket napadayawan kas “Miss South America” iti maysa a prestihiyoso a kompetision kadagiti baka.
Gapu iti daytoy, ngimmato ti demand para iti embryos-na a maus-usar kadagiti breeding programs kadagiti nagduduma a pagilian.
Naammoan a ti Nelore breed ket naggapu idiay India ken mabiag iti nadagaang a lugar.
