LAOAG CITY – Agtultuloy ti imbestigasyon dagiti kameng ti Bureau of Fire Protection iti ili ti Currimao iti pannakauram ti maysa a bakante a lote.
Segun ken ni Senior Fire Office 3 Darwin Labii, acting fire marshal iti nasao a dimmanon iti second alarm ti panagresponde da gapu iti kadakkel ti uram.
Inbatad na nga umabot iti dua nga oras sakbay a naan-anay a nasebseban ti apoy.
Immuna iti daytoy, inpakaammo ni Labii a ti bakante a lote nga adda iti asideg ti kamposanto iti nasao nga ili ket kukua ni Mr. James Gavino.
Kuna na nga awan met ti nairekord a nasugatan wenno nadangran iti nasao a pasamak ngem naruay a kayo ti nadadael.
Mainaig iti daytoy, inbatad ni Labii a basar iti inisyal a resulta ti imbestigasyon da ket posible nga adda ti nagipurwak ti sigarilyo manipod iti abandonado a balay iti asideg ti bakante a lote.
Naamoan a malaksid iti BFP iti ili ti Currimao ket timmulong iti panagresponde ti BFP Badoc, Paoay, Pinili, San Nicolas ken Laoag City.
Kabayatanna, nagballaag ni Labii iti publiko a liklikan ti panagpuor gapu ta alisto nga agkayamkam ti apoy gubuay iti napigsa nga angin.
