LAOAG CITY – Nagtapwak ti maysa a lalaki a bakasyunista iti by-pass bridge ditoy ciudad ti Laoag a nangitunda ti panagsagaba na ti ado a sugat iti nagduduma a paset ti bagina.
Nabigbig daytoy a ni Christoper Cabuga, agtawen ti 37 taga Barangay 5 iti ili a San Nicolas.
Ni Cabuga ket immay laeng nagbakasyon manipod idiay Chicago ken agawid koman intono Agosto 8 ita a tawen.
Iti eksklusibo nga interview ti Bombo Radyo Laoag iti kasinsin ni Christoper a ni Sally Cabuga, inbatad na a nagsina ti biktima ken ti asawa na isut gapuna nga agsagsagaba daytoy ti depresyon.
Kuna na a simmangpet laeng ti biktima idi Hulyo dos ita a tawen.
Inlawlawag na nga itay bigat ket nagpakada a mapan da mamigat iti ruwar kadwa na ti kabsat na a lalaki.
Kabayatanna, iti palawag ti kabsat ni Christoper ket inbilin kenkuana ti biktima a mapan da pay laeng nga umuna idiay ili ti Bacarra.
Nupay kasta, iti panagsublin da ket ditoyen a nagtapwak ni Christoper manipod iti nagluganan da nga SUV kabayatan ti kaadda dan iti by-pass bridge.
Babaen ti panagtitinnulong dagiti kameng ti rescue team ditoy ciudad ti Laoag ket naiyaon ti biktima manipod iti baba ti rangtay ken naitaray a dagus iti ospital.
