LAOAG CITY – Kinumpirmaran ni PLt. Col. Roger Digmayo, hepe ti PNP-Batac a natakawan ti maysa a bake shop iti nasao a siudad babaen kadagiti empleado.
Inbatad ni Digmayo a dagiti nangaramat ti nasao a panagtakaw ket ti mismo nga store manager ken ti service crew.
Kuna na a namunganay ti pannakaduktal ti panagtakaw dagiti suspek kalpasan a naripar ti supervisor nga agkurkurang ti maysa nga aldaw a sale ti bake shop.
Mainaig iti daytoy, inpakaamo ni Digmayo a nairekomendar ti imbestigasyon iti Human Resource Office ti bake shop ket dita a naamoan manipod iti pannaka-review ti CCTv nga inbulbulsa dagiti dua a suspek ti dadduma a nalakoan ti shop.
Innayun na a basar iti palawag dagiti nagireklamo ket maipagarup a manipod Setyembre pay laeng nga agkurkurang ti sale ti bake shop nu sadino nga umabot iti 70,000 a pisos ti total a natakaw ti store manager ken ti service crew.
Naamoan a dagiti laeng maseknan ti agpapaay iti nasoa a bakeshop.
Iti agdama ket maisagsaganan ti kaso a qualified theft kontra kadagitoy.
