LAOAG CITY – Pimmusayen ti senior citizen a karaman iti desgrasya a napasamak iti rabii ti Sabado, Hulyo 1 iti Madamba Street, bisinidad ti Barangay 3, San Ildefonso iti ili ti San Nicolas.
Ti biktima ket agtawen ti 62 a baket, naasawaan ken residente iti Barangay 14, San Gregorio iti nasao met laeng nga ili.
Ummuna iti daytoy, iti imbestigasyon dagiti otoridad ket agpalaud ti motorsiklo nga inturong ti mapapati a menor de edad ken inlubbon na ti agtawen ti 62 ken idi nakadanon da iti nasao a paset ti kalsada ket nakadinungpar da ti tricycle nga inturong ti agtawen ti 32 a residente iti Barangay 8, San Rufino iti nadakamat nga ili, nga agturong met iti laud.
Kas resulta, nagsagaba ti gasgas iti nagduduma a paset ti bagi ti menor de edad a driver ti motorsiklo idinto a ti inlubbon na ket naitaray iti Black Nazarene Hospital, ken ti driver ti tricycle ket saan a naan-ano.
Naamoan a gapo iti pannakatay ti biktima ket mapaayaban ti driver ti tricycle para iti panagsasarita.
