LAOAG CITY – Kinumpirmaran ti anak ti baket a pasyente a taga Brgy. 15 ditoy siudad ti Laoag a naipan iti medical ICU ti ina na.
Kuna na a negatibo ti ina na iti COVID-19 kalpasan a naamuan na.
Gapu iti daytoy, naragsakan dagiti miembro ti pamilya da kalpasan a nagnegatibo ti ina na.
Nupay kasta, saan pay laeng a maikkat dagiti dadduma a nakaikapet iti ina na gapu ta adda ti sakit a sagsagabaen na.
Immuna a naitaray ti baket iti Gov. Roque Ablan Memorial Hospital ditoy siudad ti Laoag ken naiyakar iti Mariano Marcos Memorial Hospital and Medical Center iti siudad ti Batac.
Kabayatanna, naikkaten ti lockdown a naipatungpal iti Brgy. 15 ditoy siudad ti Laoag.
Daytoy ti kinumpirmaran ni Mayor Michael Marcos Keon kalpasan a nagnegatibo ti baket a pasyente ken inawagan na a ni Lola Dolores.
Iti pannakiuman ti Bombo Radyo Laoag kenni Mayor Keon a naikkaten dagiti barikada iti nasao a barangay.
