LAOAG CITY – Kinumpirmaran ni Dr. Heidi Marita Albano, Municipal Health Officer iti ili ti Vintar nga adda ti pimmusay a positibo iti antigen test.
Segun kenni Albano, ti pimmusay ket agtawen ti 70 a babai ken nagpositibo iti antigen test idi Agosto 14.
Inlawlawag na a dumalan kuma daytoy itay bigat iti RT-PCR test ngem idi rabii ket naipakammo kadakuada a pimmusayen ti maseknan nga indibidual.
Kalpasan daytoy ket naitabon met laeng a dagus ti maseknan kas panangsurot iti health protocols.
Kunana nga idi na-isolate ti baket ket adda ti anak na a nagboluntaryo a mangtaripato kenkuana nga isu met ita ti naka-schedule a maipadalan iti swab test.
Kabayatanna, kuna ni Dr. Albano a disiplina ti kasapulan tapno malapdan ti panagwarasen ti covid-19.
Inpetteng na nga uray awan ti maestablisar a border checkpoint wenno barangay checkpoint no laketdi sumurot a nalaing ti publiko iti health protocols ket awan ti agbalin a problema.
