LAOAG CITY – Agkurkurang ti bakuna kontra iti rabies ditoy siudad ti Laoag.
Daytoy ti inpakaammo ni Dr. Rodrigo Catcatan, mangidadaulo ti City Health Office ditoy siudad.
Segun kenkuana, adda ti baro a simmangpet a bakuna ngem dumanon laeng iti 400 vials daytoy no sadinno ti pakaipapanan ti maysa a botelya wenno vials ket para iti dua a tao.
Inbatadna nga adda ti 20 nga indibidual ti agturturong iti opisinada iti kada aldaw banag a masapol laeng a matulungan dagiti agkasapulan ti bakuna.
Inlawlawagna nga adda pay ti gundaway a dumanon iti 50 a tattao ti mapan iti opisinada tapno agpatudok kontra iti rabies.
Kabayatanna, kunana a dagiti mapmapan iti City Health Office ket saan laeng a dagiti mismo nakagat ti ayup kas ti aso wenno pusa no di ket dagiti pay nakaramutan laeng ngem masapol latta a maipasigurado ti kinatalgedda iti rabies.
