LAOAG CITY – Inlawlawag ni Maria Teresa Bagaoisan, ti kapadasan na bayat a nakaquarantine iti barangay isolation facility iti Brgy. Estancia iti ili ti Piddig.
Daytoy ket gapu iti maipagarup a panangpangta ken panangkariyar kenkuana ni Mrs. Shirley Balguna, ti asawa ni Barangay Chairman Felimon Balguna idi rabii.
Segun kenni Bagaoisan, nabayagen a karkariyaren daytoy ni Mrs. Balguna ken arig nga isu ti pagipapasan na iti pungtot daytoy.
Kuna na nga awan met ti nasalungasing na bayat iti panagquarantine daytoy.
Inbatad ni Bagaoisan a dagiti tanod ti nangibaga kenkuana mainaig ti panangpangta ni Balguna kenkuana.
Kalikagum ni Bagaoisan a maiblotter ti inaramid ti asawa ti kapitan ken kaykayat nan ti aghome quarantine tapno saan a maulit insidente.
Kabayatanna, naglikudan ni Mrs. Shirley Balguna ti alegasyon ken saan na pay a nakita ti rupa ni Bagaoisan.
Kuna na a saan na a kinaryar ti maseknan ngem inadmitir na a napan na rinaot iti pagtaengan da iti kallabes.
Inadmitir na pay nga adda ti sakit ti nakem na kenni Bagaoisan agraman ti ina daytoy.
Iti sabali a bangir, inbutaktak ni Barangay Chairman Felimon Balguna a timmawag dagiti agbanbantay iti barangay hall mainaig iti panagwalwala ti asawa na a ni Shirley Balguna.
Kuna na a saan na anaabutan ti insidente gapu ti adayo ti distansya manipud iti pagtatalonan a lokasiyon na ken iti barangay hall.
Inbatad ti kapitan a nadanun na laeng nga agtugtugaw ti asawa na ken kasarsarita na dagiti agbanbantay.
Nupay kasta, saan nga ammo ti kapitan ti gapu na iti panagwalwala ti asawa na.
Innayon ni Balguna a naiyakar ti balasang iti Brgy. 17 quarantine facility tapno saan a maulit ti insidente ken isuda met laeng nga opisyal ti barangay ti mangbantay kenkuana.
Nagyaman met ni Balguna kadagiti opisyal ti Brgy. 17 a nangipalubos a maipan ti balasang kalpasan ti insidente.
