LAOAG CITY – Ibilang ni Police Captain Norman Pentang, ti Hepe iti Philippine National Police iti ili ti Dingras a nasolbaren ti kaso maipapan iti panagbekkel ti agtawen ti 20 a balasang ken residente iti nasao nga ili.
Segun kenkuana, apaman a nakaawatda ti report nga adda ti nagbekkel iti lugarda ket dagus dagitoy a napan nagresponde ket ditoy a nakitada ti biktima a maysan a nalamiis a bangkay.
Inbatadna a basar iti insayangkatda nga imbestigasion ket nakita ti biktima a nakabitinen a nakapulipol ti tali iti tengngedna iti mismo uneg ti kuarto daytoy.
Inlawlawagna a maibasar iti panageksamin ti Municipal Health Officer ti bangkay ti maseknan a biktima ket awan ti foul play a napasamak iti nasao nga insidente.
Innayonna a segun iti pannakisarsaritada iti pamilia ti biktima ket saanen unay a rumrummuar ti balasang iti pagtaenganda sipod nagsinada iti boyfriend daytoy.
