LAOAG CITY – Natay ti maysa a balasang kalpasan nga inrantana nga indungpar ti motorsiklona nga Honda Wave iti puon ti narra iti Barangay Mariquet iti ili ti Solsona.
Segun ken ni P/Maj. Chris Anthony Sorsano, Hepe ti Solsona Municipal Police Station, ti biktima ket agtawen ti 16 ken residente iti Barangay Manalpac iti nasao met laeng nga ili.
Inbatadna a basar iti inwayatda nga imbestigasion, naggapu iti maysa a pagiinuman ti biktima sakbay iti napasamak nga insidente.
Inlawlawagna a basar iti pannakisarsaritada kadagiti nakainuman ti menor de edad ket nagriri ti biktima ken ti boyfriend-na iti saan pay a masinunuo a rason.
Mainaig iti daytoy, kuna ni P/Maj. Sorsano a gapu iti problema iti relasion ket isu ti nangiduron tapno aramiden ti biktima a dungparen ti puon ti narra a nangitunda ti pannakatayna.
Naammoan a nagsagaba ti sugat iti nagduduma a paset ti bagi ti biktima no sadinno a natukkol ti luppona gapu iti insidente.
Naitaray iti Piddig District Hospital ti biktima ngem naideklarar a dead on arrival babaen ti attending physician.
Kabayatanna, inpakaammo ni Sorsano a saan a nakasuot ti helmet ti biktima idi napasamak ti desgrasia.
