LAOAG CITY – Nabagkong ti maysa a balasang babaen ti uliteg na idiay Barangay Adams, iti ili ti Adams, Ilocos Norte.
Nabigbig daytoy a ni Mary Anne Bataan y Gulayan, agtawen ti 20 idinto a ti suspek ket ni Alex Zamura y Dulog, agtawen ti 39, agpada a residente iti nasao a lugar.
Segun ti imbestigasyon dagiti otoridad, bayat a magmagna ti biktima iti sangwanan ti Adams National High School ket nakita ti suspek ket ditoy a dinanog na lattan ti biktima.
Gapo iti daytoy, nasugatan ti bibig ti biktima ken apaman nga adda iti sangwanan ti kabagyan da met laeng ket binagkong na iti akin-kannigid a bukot na.
Naitaray ti biktima iti Rural Health Unit iti nasao nga ili.
Ti nasao a suspek ket naglibas kalpasan ti insidente ken maisagsaganan ti kaso kontra kenkuana.
