LAOAG CITY – Natay ti agtawen ti 14 a balasitang kalpasan a binagko-bagkong ti uliteg na iti Brgy. 15 iti ili ti Vintar.
Inpakaammo ti hepe iti nasao nga ili a ni PMaj. Reginaldo Dalipias Jr., a basar iti naiyuswat nga imbestigasyon, agawiden ti biktima iti pagtaengan da idi kellaat a sinabat ti suspek nga agtawen ti 50 ken kayong ti ama na.
Kuna na a dita a kinompronta ti suspek ti balasitang ken binagkong na iti namin ado a daras.
Gapu iti daytoy, nagsagaba ti sugat iti nagduduma a paset ti bagi ti biktima partikuar iti kili-kili, lapayag ken ima.
Kabayatanna, inbatad ni Dalipias a kalpasan a nabagkong ti suspek ti biktima ket binagkong na met ti buksit na iti namindua a daras.
Agpada dagitoy a naitaray iti ospital ngem naideklara a dead on arrival ti balasitang.
Immunan nga inpakaammo ti hepe a ti makitkita a rason nu apay nga inaramid ti suspek ti krimen ket gapu iti pungtot.
Inbatad na nga addan ti immuna a panangireport ti biktima iti suspek iti nailian a pulisya idi domingo gapu iti maipagarup a pannagpungot-pungot ken panangkarawa na iti daytoy.
Naamoan nga agpada a saan a kabbalay ti biktima dagiti nagannak kenkuana gapu ta agtrabtrabo dagitoy iti metro manila ken agtaltalinaed iti lolo na.
Kabayatanna, narekobre iti nakapasamakan ti insidente ti nausar a kutsilyo nga agatiddog iti 13 a pulgada.
