LAOAG CITY – Natakawan ti balay a kukua ti maysa a pribado a kompanya ngem naitalek iti maysa a pulis tapno bantayan ken pagyanan na iti Barangay 23 ditoy ciudad ti Laoag.
Nabigbig ti biktima a ni Police Staff Sergeant Joefrey Crisologo Robles, agtawen ti 33, naka-assign iti INPPO PIDMB, taga ili ti Bacarra ngem agdama nga agnanaed ti nasao a barangay.
Basar iti report, iti panagawid ni Robles ken ti asawa na ket nasangpetan da a naiwarwara dagiti kagamitan da, ken dagiti cabinet ken durabox ket nakalukat.
Iti panagsawar da iti uneg ti balay ket naduktalan da a mapukpukaw dagiti dua a laptop nga agbalor dagitoy iti agarup 40 a ribo pisos, ken ti isyu ni Robles a paltog a Pistol Taurus TS9 Caliber 9mm, tallo a magazine ken 42 a bala.
Iti imbestigasyon, nadiskubre a nadadael ti alad ken ridaw ti likud ti balay a possible a nagserkan ken rimuaran dagiti suspek.
Agtultuloy ti imbestigasyon dagiti otoridad seknan iti nasao a panagtatakaw.
