LAOAG CITY – Ado dagiti Pilipino idiay Houston ti sobra a naapektaran ti layos a gubuay ti Tropical Depression Imelda.
Daytoy ti kinumpirmaran ni Bombo International Correspondent Cheryl Echols, taga Las Piñas City ngem agdama nga agnanaed idiay Houston.
Inbatad ni Echols nga ado dagiti Pilipino idiay Houston ti nakasarsarita na ken naamoan na a ti balay dagiti sumagmamano kadagitoy ket natinepen ti danom.
Inpakaammo pay ni Echols a gapu ti mapaspasaran da a layos ket napukawan da ti suplay ti kuryente ken nasuspenso ti serrek kadagiti pagadalan ken trabaho.
Innayon na nga uray dagiti establisimiento iti nasao a lugar ket nagserra da.
Iti agdama, kuna ni Echols a makumikum dagiti opisyal ti gobierno ken dagiti otoridad iti panangtulong da kadagiti residente iti panangidaulo ti mayor idiay Houston.
Malaksid kadagiti residente, ado pay dagiti ayop a karaman nga iresrescue dagiti otoridad.
