LAOAG CITY – Adda ti nasurok 10 a gramo a maatap a shabu ti nakumpiskar dagiti otoridad manipud iti pagtaengan ti subject ti search operation iti Barangay Canaan iti ili ti Badoc.
Ti search operation ken inpatungpal iti nagtipon a pwersa ti Philippine Drug Enforcement Unit ken dagiti kameng ti Ilocos Norte Police Provincial Office ken Philippine National Police iti ili ti Badoc iti balay ti subject a ni Tyron Mark Calaycay a residente iti nadakamat a barangay.
Naamoan a ti search warrant ket iinparuk-at ni Judge Maria Corazon M. Labrador ti Regional Trial Court, Branch 18 iti ciudad ti Batac gapu ti panagsalungasing ti Republic Act 9165 wenno Comprehensive Dangerous Drugs Act of 2002, a napetsaan iti Pebrero 18.
Kabayatan na, inpakaammo ti Philippine Drug Enforcement Unit nga awan ti suspek iti balay da idi naipatungpal ti search operation ngem naimatangan ti ama na a ni Brgy. Chairman Tomas Calaycay ken tallo a barangay kagawad ti panagsukimat da iti balay.
Ibilang ti Philippine Drug Enforcement Unit a nagballigi latta ti operasyon gapu ta nakakumpiskar da ti mapapati a shabu nga agdagsen ti nasurok 10 a gramo ken agbalor ti 68 ribo a pisos.
Gapu iti daytoy, mapilaan ti suspek ti kaso a panagsalungasing iti Republic Act 9165 Comprehensive Dangerous Drugs Act of 2002 babaen ti regular filling gapu ta agpapan ita ket saan pay a natiliw ti suspek.
