LAOAG CITY – Agtultuloy pay laeng ti imbestigasyon iti pannakapalto-paltog ti balay ti dati a Barangay Kagawad a ni Fred Eda idiay Barangay Libtong, Bacarra, Ilocos Norte.
Segun kenni Eda, saan na a napuutan dagiti putok ti paltog iti balay da no diket dagiti annak na ti nakangeg
Inlawlawag na nga awan ti ammo na a rason no apay a pinalto-paltogan dagiti saan pay nabigbig a suspek ti balay na gapo ta awan met ti nakariri na.
Inbatad na nga iti rabii ti Abril 25 ket nagtataol ti aso ngem awan met ti nakita da a to iti lawlaw da.
Mainaig iti daytoy, kuna ni Mr. George Lazo, naikamang iti pamilya Eda, agarop 4:30 itay parbangon idi nakangeg ti lima agingga iti innem a putok ti paltog.
Kunana a kalpasan ti pammaltog ket adda ti nangeg na nga ungor ti motorsiklo a napaspas a naggapo iti daya a direksyon.
Naamoan nga iti nasao nga oras ket isu ti masansan a panagaw-awid ti katungaan na a lalaki a ni Mr. Nestor Eda, kabsat ni Fred, ken agpapaay a security guard ni Mayor Nicomedes dela Cruz iti nasao nga ili.
Nakarekobre ti SOCO ken PNP-Bacarra dagiti sumagmamano a kapsula ti kalibre 45 a paltog ken M16 armalite iti sirok ti mangga, saan unay nga adayo iti balay ni Eda.
Kabayatanna, inbatad ti PNP-Bacarra a mistaken identity ti napasamak a pannakapalto-paltog ti balay ni Fred Eda gapo ta ti maipagarop a targer dagiti saan pay a nabigbig a suspek ket ni Mr. Nestor.
Naamoan nga iti nasao nga oras ket isu ti panagaw-awid ni Mr. Nestor ngem nairana a saan a nagawid idi napasamak ti pammaltog.
Naamoan a ti balay ni Eda ket isu ti pagbulbulaan ti Small Town Lottery (STL).
