LAOAG CITY – Naminpinsan a dimmapo ti maysa a balay idiay Barangay 1, Barbaqueso, Carasi, Ilocos Norte.
Nabigbig ti agtagikua ti balay a ni Ferick Mar Gregorio, agtawen ti 24, naasawaan, maysa a mannalon ken residente ti nasao a lugar.
Iti imbestigasyon, bayat nga aglutluto ni Gregorio babaen ti panagusar na iti uring ket napan dimmaw-as ti balay ti ama na.
Nakigtot laengen idi napan inpakaammo kenkuana ti kabsat na a ni Foly Mar Gregorio a maur-uram ti balay na.
Segun ken ni PO3 Keneth Matute, imbestigador iti PNP-Carasi, possible a ti nabaybay-an a malutluto ti nangrugyan ti apoy.
Naamoan nga alisto a nagramram ti apoy gapu ta naaramid laeng ti balay kadagiti light materials.
Saan pay a madeterminar no mano ti balor dagiti nadadael ti napasamak nga uram.
