LAOAG CITY – Naminpinsan a dimmapo ti maysa a balay iti napasamak nga uram iti Sitio Lusong, Barangay 29 ditoy ciudad ti Laoag.
Daytoy ti inbatad ni Fire Senior Inspector Ronald Castillo, ti Firemarshall ditoy ciudad ti Laoag.
Segun ken ni Castillo, iti imbestigasyon da ket naduktalan a ti nangitunda iti uram ket ti nabaybay-an a paglutwan.
Kuna ni Castillo a naamoan da a nangisaang ti bagas ti akin-balay a maysa a pintor a binigbig na a ni Ponciano kalpasan na ket napan iti barkada na iti Barangay 27 ditoy ciudad ti Laoag.
Inpakaammo na nga awan pulos a nasalbar a kagamitan ti maseknan gapu ta dimmapo da amin iti pannakauram ti balay na.
Innayon na nga iti inisyal a komputasyon da ket mapatta-patta nga umabot iti 20 ribo a pisos ti balor dagiti nadadael ngem mabalin a ngumato pay gapu ta saan pay a nairaman dagiti kagamitan wenno us-usaren ni Ponciano iti panagpinta na.
