LAOAG CITY – Nagreklamo ni Mr.Gil Lagac, naggapu iti Estados Unidos, tubo iti ili ti Pasuquin, kontra iti Farmside Hotel, maysa a quarantine facility ti gobyerno probinsyal.
Daytoy ket gapu iti narugit a lababo ti banyo, awan ti pagorderan iti makan a nasken kuma nga adda iti nasao a quarantine facility malaksid laeng ti ipaay da, ken saan a naikkan ti gundaway nga agpili iti pakaipanan na a pasilidad.
Kuna na a mabalin iti agpili iti papanan a quarantine kas iti naipalaon iti protocol ngem iti napasamak kenkuana ket naidiretso iti nasao nga hotel.
Segun kenni Lagac, nagkiddaw a maiyakar iti quarantine facility ngem naparitan.
Inbatad na nga awan pay ti mausar na a communication device kas iti telephone wenno intercom no bilang adda ti mapasamak kenkuana.
Inbunannag ni Lagac a naibaga dagiti personnel iti nasao nga hotel a saan a mabalin nga umakar idinto nga awan ti komento da kadagiti reklamo da mainaig iti narugit a lababo, kaawan dagiti communication device ken dadduma pay.
Mainaig iti daytoy, iti panagturong ti Bombo Radyo iti nasao nga hotel, kuna ti saanen a nagpabigbig a personnel a no mabakantean ti maysa kuarto ket dita a madalusan sakbay nga adda ti maiserrek ngem no nabayag a maakumodar ti kuarto ket inaldaw a madalusan daytoy.
Inadmitir ti personnel a nadadael ti koneksiyon dagiti intercom kadagiti kuarto a nakaikamang iti frontdesk agraman nga awan ti internet na.
Uppat nga aldawen a nakaquarantine ni Lacag iti nasao nga hotel.
