LAOAG CITY – Maysa a naidumduma a Christmas tree idiay Munich, Germany ti naitampok iti headquarters ti Pro Aurum, maysa a nalatak a gold dealer. Ti kayo a mapattapatta nga agbalor ti $5.5 milyon ket naaramid iti gold coins ken naidisenio kas pananglagip iti maika-35 nga anibersario ti kompania.
Ti 10 a kadapan a kayo ket nabukel babaen iti pannakitinnulong ti Austrian State Mint. Nagusar daytoy ti 2,024 a pedaso ti Vienna.
Philharmonic gold coins, maysa kadagiti kalalatakan a commemorative coins iti intero a lubong. Imbes a tradisional a bituen, maysa a dakkel a 24-karat gold coin ti nakaikabil iti tuktok daytoy.
Basar iti Pro Aurum, ti gagem ti balitok a Christmas tree ket maipakita ti kinapateg ti balitok a maiyarngi iti panagbalinna nga “evergreen” dagiti Christmas tree.
Nupay kasta, maisupadi iti namnamaen dagiti interesado a bilionario, ti kayo ket saan a mailaklako.
Naammoan nga uray naisangsangayan ti kinapintas ti balitok a Christmas tree, saan daytoy ti kanginaan iti pakasaritaan.
Ti titulo para iti kanginaan a Christmas tree ket nai-display idi 2010 iti Emirates Palace Hotel idiay Abu Dhabi nga agbalor ti $11 million.
Kabayatanna, ti 43-feet Christmas tree ket inarkosan ti 181 a pedaso ti nababalor nga alahas ken binigbig daytoy ti Guinness Book of World Records kas “Most Expensive Christmas Tree.”
