LAOAG CITY – Manamnama a maestablisar ti Ballet School ditoy probinsia babaen ti Ballet Philippines.
Daytoy ket kalpasan a nakita ti nasao a grupo ti gagar dagiti ubbing a makasursuro iti ballet.
Segun kenni Ms. Carrie Domingo, Chief Operating Officer ti Ballet Philippines, napanunut da daytoy nga addang tapnu saanen nga umadayo pay dagiti ubbing a mapan agsursuro idiay Manila.
Kunana a ti possible a pakaestablisaran ti Ballet School ket iti sitio Remedios Heritage Village iti Brgy. Victoria iti ili ti Currimao.
Immuna iti daytoy, naisayangkat ti outreach program ti nasao a grupo a nakipartisiparan ti sumurok kumurang 20 nga estudyante iti Wilbur Go. Elem. School a nakasursurwan da kadagiti basic steps iti ballet.
Mainaig iti daytoy, nagyaman ni Domingo kenni Dr. Joven Cuanang, maysa kadagiti Board of Trustees ti Ballet Philippines a nangawis kadakuada iti panangisayangkatda ti nasao nga aktibidad ditoy probinsia.
Kabayatanna, inpakaammo ni Mr. Ranz Damian, Marketing Associate ti ballet Philippines a mangisaysayangkatda ti outreach program iti nagduduma a paset ti pagilian.
Segun kenkuana, mangnamnamada a babaen iti daytoy ket maiwalin ti pammati ti kaaddoan a ti “ballet” ket para laeng kadagiti babaknang.
Inbatadna a naruay iti grupoda ti nainspiraran a simrek iti “ballet” gapu iti pannakaisayangkat ti “outreach program” kadagiti bukudda a lugar.
Kinuna ni Damian a tarigagay ti grupoda nga ad-adu pay nga ubbing ti mainspiraran nga ag-ballet tapno dagitoy ti mangisuro kadagiti sumarsaruno pay a henerasyon.
Patienna a ti “ballet” ket napateg iti “arts” ken kultura iti pagilian a saan a rumbeng a mapukaw.
Innayonna a pakaragsakan ti grupoda no maikkan pay dagitoy ti sabali a gundaway nga umay mangisuro ti ballet iti dadduma pay a paset ti Ilocos Norte.
