LAOAG CITY – Nagyaman ni Mrs. Cheryll Sacatrapos, asawa ti pimmusay a ni PO3 Fernando Sacatrapos kadagiti kameng ti Philippine National Police kadagiti inaramid da tapno magun-od ti hustisya iti pannakapapatay ti asawa na.
Napalto-paltogan ni PO3 Sacatrapos idi Setyembre 1, 2016, iti Batac-Paoay Road, Brgy. Salbang iti ili ti Paoay bayat nga agsubli iti PNP Paoay a naggapu iti maysa a training-seminar.
Kuna na a babaen ti panagporsigi dagiti otoridad a mangsolbar iti pannakapapatay ti asawa na ket natiliw met laeng ti suspek.
Natiliw ti akusado a ni Abet Duguen y Chavez, agtawen ti 36, maysa a security guard, iti pagnanaedan na idiay Orhards Towers Condominium, Amang Rodriguez Ave., Brgy. Mangahan, Pasig City, Metro Manila babaen ti bileg ti warrant of arrest.
Inadmitir ni Mrs. Sacatrapos a saan pay a naikkat ti pungtot na iti pimmatay ti asawa na.
Kinumpirmaran na nga adda ti naaw-awat ti asawa na a pangta iti biag mainaig iti panagtrabaho daydi asawa na.
Ti PO3 Sacatrapos ket intelligence officer ti PNP Paoay iti kallabes ken isuna ti mangipatpatungpal ti kampanya ti PNP Paoay kontra iti iligal a druga iti kallabes.
Maipalagip a nagkari ni Presidente Rodrigo Duterte ti maipaay a tulong pinansyal kada Mrs. Sacatrapos ken ti asawa ti pimmusay a pulis a ni PO3 Nestor Sadian, imbestigador ti PNP Paoay nga immununa a napaltogan.
Naamuan a tallo ti annak ni PO3 Sacatrapus a napanawan na.
