LAOAG CITY – Kinumpirmaran ni Police Major Carlo Abing, ti chief of police ti PNP-Sarrat a nabirukan dan ti balod a naglibas.
Segun kenni Abing, nabirukan da ti naglibas a balod iti mismo kubo-kubo a kukua ti karruba da a sumagmamano laeng a metro ti kaadayo na iti pagtaengan da.
Inlawlawag na nga idi kalman ket ummuna a nagturong da iti pagtaengan ti nasao nga indibidual ken iti aglawlaw iti Barangay 23 ngem saan da a nabirukan.
Kuna na a nagturong iti kabanbantayan ti maseknan ken itay bigat ket napanunutan na a bimmaba ken napan iti kubo-kubo.
Inpetteng na nga idi nakita dan ti suspek ket adda ti iggem na nga immuko ken maipagarop a ginandat daytoy a bagkongen ti maysa kadagiti pulis.
Rumrumuar a limmaban ti suspek ken sinalakniban dagiti pulis ti bagbagi da a rason ti maipagarop a pannakadangran na.
Mainaig iti daytoy, kuna ni Abing nga agtultuloy pay laeng ti imbestigasyon dagiti da seknan iti panaglibas ti suspek.
Maipalagip a naglibas ti maseknan iti kwerpo ti pulisya iti kallabes ken itay bigat a nabirukan dagitoy.
Ti nasao nga indibidual ket sumangsango iti kaso a Paricide ken panaglasbing iti RA 10591.
