LAOAG CITY – Irekreklamo ni Mr. Domingo Batac, taga Cacafean iti ili a Marcos ken simmuko a mismo idiay New Bilibid Prison, ti sitwasyon da ita iti nasao a pagbalodan.
Segun kenkuana, nasurok da 200 a simmuko ngem maymaysa ti CR nga us-usaren da, awan ti naited a pagiddaan da uray laeng no karton ken bassit ti maipakpakan kadakuada.
Gapo iti daytoy, kalikagom na a maipadanon kadagiti maseknan ti agdama a kasasaad da tapno maipaalisto ti pannaka-adal ti papeles na gapo ta ammo na a nakarwar babaen iti legal a wagas.
Inlawlawag na a naiserbi nan ti sentensya ngem gapo ta nairaman ti nagan na listaan ket simmuko latta kas panangsurot iti nagbalin a mandar ni Presidente Rodrigo Duterte.
Nupay kasta, agpapan ita ket awan pay ti inbaga ti BuCor kenkuana a mabalinen nga agawid ken saan a karaman kadagiti rumbeng nga agsubli iti pagbalodan.
Inpetteng na a nagulo ti panagtrabaho ti Document Section ti BuCor gapo ta uray dagiti simmuko nga awan iti listaan ket inawat latta ti nasao nga ahensya.
