LAOAG CITY – Inbatad ti Department of Agriculture nga umaboten iti P3.11 billion ti balor dagiti nadadael iti agrikultura iti iduduprak ti Severe Tropical Storm Kristine.
Basar iti Department of Agriculture, kaadoan kadagiti nadadael iti agrikultura ket dagiti mula a pagay nga umabot iti 152,440 a metriko tonelada.
Inpakaammo ti Department of Agriculture a dagiti dadduma a naapektaran ket mula a mais nga umabot iti 1,461 a metriko tonelada, balanghoy a 126 a metriko tonelada ken ti high value crops a 6,014 a metriko tonelada.
Nakairekord pay ti Department of Agriculture ti 2,862 a dingwen a pimmusay ken 98 a fisheries ti naapektaran.
Kabayatanna, kuna ti ahensya a nakasaganan ti P541.02 million a balor ti agricultural inputs a maibunong para kadagiti naapektaran a mannalon.
Innayon ti ahensya a matulungan pay dagiti apektado a mannalon babaen iti Quick Response Fund, Survival and Recovery (SURE) Loan Program, ken ti Philippine Crop Insurance Corporation.
