LAOAG CITY – Inpakaammo ni Fire Supt. Floro Obrero, ti fire marshall ditoy siudad ti Laoag nga addan ti makitkita da a namunagayan ti napasamak nga uram iti maysa a shopping center ditoy siudad.
Segun kenkuana, nakita iti maikatlo a kadsaaran ti pasdek negosyo ti posible a nagrugyan ti uram partikular iti pantry area.
Inbatad na a posible nga adda ti pimmutok a saksakan gapu iti nagsisipol nga extension wenno adda ti octopus connection nu sadino a nakasaksak dagiti nagduduma nga appliances.
Mainaig iti daytoy, inpakaammo na a mapatta-patta a 15 a milyon a pisos ti balor dagiti nadadael iti napasamak nga uram.
Innayun na a maiyuswat pay ti naun-uneg a panagimbestigar iti daytoy a banag.
Kabayatanna, kuna ni Obrero a naikkan ti pawayway nga innem a bolan ti pasdek negosyo a mangileppas kadagiti masapol a masurot iti Revised Implementing rules and Regulations (RIRR) ti Fire Code of the Philippines.
Inbatad na a karaman ditoy ti pannakakumpleto ti automatic fire alarm system, automatic fire suppression system ken fire exit.
