LAOAG CITY – Umaboten iti 520 milyon pesos ti inisyal a balor dagiti nadadael nga imprastraktura iti umuna a distrito kalpasan ti iduduprak ti Supertyphoon Carina.
Daytoy ti inpakaammu ni Engr. Robert Rabago, mangidadaulo ti maintenance team ti Department of Public Works and Higways (DPWH) 1st District Engineering Office.
Kunana a dagiti nadadael ket manipud kadagiti nagduduma a munisipalidad, partikular iti ili ti Bangui ken ditoy ciudad ti Laoag, no sadinno a kaaduan kadagiti nadadael ket dagiti national road, barangay roads ken flood control.
Nu pay kasta inpakaammu pay ni Rabago a no saan a gapu iti naglabas a bagyo ti rason no apay a nadadael dagiti nadakamat nga imprastraktura ket masapul nga tarimaanen dagiti kontraktor ken isuda pay ti mangibaklay iti magastos. Kabayatanna, inpasimudaag ni Engr. Rabago a mabalin a ngumato pay ti balor dagiti nadadael nga imprastraktura gapu ta naruay pay dagiti saan pay a nakapagsubmitir ti report da seknan iti daytoy.
