LAOAG CITY – Inrakurak ti Provincial Tourism Office ti presio dagiti ticket a mailako iti pannakaiyuswat ti Himala sa Buhangin ita a tawen.
Segun ken ni Mr. Xavier Ruiz, Officer In Charge ti Provincial Tourism Office, ti regular rates ti gold ticket ket 1,500 a pisos, Silver A ket 500 a pisos ken Silver B ket 300 a pisos no sadinno a daytoy ket available kadagiti amin nga SM ticket outlets iti intero a pagilian wenno iti www.smtickets.com.
Inbatadna a para kadagiti residente ditoy Ilocos Norte ket addaan ti special rates a gold ticket ket 750 a pisos, 200 a pisos no Silver A ken libre no Silver B a no sadinno a mabalin met a magatang iti himala.ilocosnorte.ph.
Inlawlawagna a malaksid kadagiti tickets ket inpublikarda payen ti nagan dagiti artist nga ag-perform nga isuda Zack Tabudlo ken Shanti Dope.
Kunana nga adda pay ti maiyuswat a 4×4 race., beach volleyball, sandboarding, sand castle making, surfing, fire dance ken dadduma pay.
Innayonna a 20 a milyon a pisos ti proposed budget-da ken ni Gov. Matthew Marcos Manotoc para iti pannakaipatungpal ti naindaklan nga aktibidad ti probinsia.
Maipalagip nga immunan nga inrakurak ni Ruiz a daytoy ti kaunaan a gundaway nga adda ti ticket a mailako sipod nangrugi ti Himala sa Buhangin idi tawen 2012.
