LAOAG CITY – Dumanonen iti sumurok P3 billion ti pakabuklan a pannakadadael iti imprastraktura ken agrikultura gubuay iti nagsaruno a Bagyo Tino ken Uwan, basar iti report ti National Disaster Risk Reduction and Management Council (NDRRMC).
Dumanon met iti P1 billion a balor ti food ken non-food relief items ti naipaay kadagiti lugar a naapektaran idinto a sumurok 90,000 a pamilia wenno 300,000 nga indibidual ti nagtalinaed kadagiti evacuation center iti intero a pagilian.
Nakaipaay ti Department of Social Welfare and Development (DSWD) ti P612 million nga ayuda iti sumurok 2.25 milyon a pamilia a naapektaran iti Bagyo Uwan.
Basar iti datos ti ahensia, adda ti sumurok 12 million ti naapektaran ti Super Typhoon Uwan no sadinno a dimmanon iti P2.01 billion ti nadadael iti imprastraktura ken P182.38 million iti agrikultura.
Adda ti 26 ti naipadamag a natay ken sumurok 253,000 a pagtaengan ti nadadael.
Nangibati ti P490.11 million a pannakadadael iti imprastraktura ken P484.87 million iti agrikultura ken nangitunda ti 250 ti natay ken sumurok 265,000 ti nadadael a pagtaengan gapu iti Bagyo Tino.
Kabayatanna, inrakurak ni Department of Social Welfare and Development Asst. Sec. Irene Dumlao nga amin a pamilia a naapektaran, adda man iti evacuation centers wenno nakipagnaed kadagiti kabagianda ket kualipikado a makaawat ti tulong.
