LAOAG CITY – Saan a pinakawan ti biktima ti suspen a nagtalaw iti mismo a cuerpo ti pulisya ti ili a San Nicolas.
Pinilaan ni Jacia Mae Pimentel y Respicio, agtawen ti 26, awanan asawa, Criminology Student ti Northwestern University ken residente iti Brgy. Nagbalagan, Bangui, Ilocos Norte ti reklamo ti suspek a ni Rodel Agsunod y Agpalza, addaan ti umno a tawen ken residente ti Brgy. 14, Vintar, Ilocos Norte.
Daytoy ket kalpasan a naduktalan a daytoy ti nangala ti kuwarta ti biktima nga adda iti uneg ti bag na nga agdagup iti 9,600 pesos.
Naamuan a theft ken panagusar ti palso a nagan wenno panagsalungasing ti Art. 178 ti Revised Penal Code ti naipila kontra iti suspek iti opisina ti Provincial Prosecutor.
Maipalagip nga immuna a napukaw ti kuwarta ni Pimentel nga agpapaay nga on-the-job trainee iti PNP-San Nicolas ket atapen na nga aramid daytoy ti suspek nga iti dayta a kanito ket nakabalod gapu iti pannakatiliw na a nagmaneho a nabartrek.
Mapattapatta a ginaw-at ti suspek ti bag ti biktima bayat a nakaparabaw iti lamisaan nga adda iti asideg ti karsel na ket naduktalan kalpasan a rinikisa na ti sling bag a naglaon iti nasao a kantidad.
Nagusar pay daytoy iti sabali a nagan idi damagen da no ania ti nagan na idinto nga inbaga na idi natiliw a nabartek a Rodel Agsunod.
